Java IDE

စကားကြို ခံထားပါရစေ။ ကျွန်တော် Programmer မဟုတ်ပါ။ ဒါပေသိ ကွန်ပျူတာတက္ကသိုလ်မှာ လေးနှစ်ကြာ ပျင်းရိစွာနေခဲ့ရသော ကျေးဇူးတွေကြောင့် အနည်းငယ် တီးမိခေါက်မိပါတယ်။ ကျောင်းက Language ကိုလည်း မျိုးစုံသင်သောကြောင့် ဟိုစပ်စပ် ဒီစပ်စပ်နဲ့ အကုန်လုံးကို အနည်းငယ်စီသိပါတယ်။

ကျောင်းက အဲဒီလိုပါ။ C++, VB, Java စတာတွေကို တစ်နှစ်ချင်းစီ သင်ပါတယ်။ ဒါပေမဲ့ ကျောင်းသာ ပြီးသွားရော၊ ဘယ်ကျောင်းသားမှ ဖြစ်ဖြစ်မြောက်မြောက် မတတ်ပါ။ ဘာကြောင့်လဲဆိုတော့ ဟိုဟာလည်း အင်ထရို၊ ဒီဟာလည်း အင်ထရိုနဲ့ ကျွန်တော်တို့လည်း အင်ထရိုကနေ မတတ်တော့တာပါ။အခုလည်း ကြည့်ပါဦး။ Third Year မှာ Java သင်တယ်။ Hons မှာ မသင်တော့ဘူး။ Master မှာလည်း မသင်ဘူး။ အဲ အခု Master ဖြေပြီးတော့ Thesis လုပ်ရမယ်တဲ့။ Theory တစ်ခုခုကို အခြေခံပြီးSoftware တစ်ခု ရေးရမယ်တဲ့။ Java နဲ့ဆို ပိုကောင်းတယ်တဲ့။ သူတို့ ပြောသွားတာ တစ်ခွန်းရယ်။ ကျောင်းသားတွေမှာတော့ ဖုန်တက်နေတဲ့ Java စာအုပ်တွေကို ပြန်ရှာ၊ ပြန်ကျင့်။

အဲ. အဲဒီမှာ ကျောင်းသားတွေ ဒုက္ခစတွေ့တော့ပါပဲ။ သိတဲ့အတိုင်း Software တစ်ခုရေးပေးရမှာဆိုတော့ GUI လိုလာပြီလေ။ Form တွေရေးရမည်။ Button တွေထည့်ရမယ်။ ဘယ် Button ကို နှိပ်ရင် ဘာဖြစ်စေ၊ ညာဖြစ်စေပေါ့။ မန်းပေးရမှာ။ ပြီးတော့Menu Bar တွေ ဖောက်ရမယ်။ File ကနေ Exit ကို နှိပ်ရင် Program ကြီးပိတ်။ အဲဒီလိုလေ။ခက်တာက ကွန်ပျူတာတက္ကသိုလ်က သင်ပေးတဲ့ Java ဆိုတာက အဲဒီအဆင့်ထိ သင်မပေးပါဘူး။ ပြောမယ်ဆို CUI (Command-line User Interface) ပဲ သင်တယ်။ GUI (Graphical User Interface) မသင်ဘူး။ လုံးဝ မသင်ဘူး။ အဲ အခု Thesis ကျတော့ GUI နဲ့ လုပ်ရမှာ။ ဘယ်လိုကြီးမှန်းကို မသိပါဘူးဗျာ။ ဒါပေမဲ့ ကွန်ပျူတာကျောင်းသားတွေလေ။ Master ထိ တက်ပြီးပြီ။ Thesis လုပ်မှ ဘွဲ့ရမှာ။ ဘာရမလဲ။ လုပ်ကြမယ်ပေါ့။ ကဲ. လာ Java နဲ့ GUI Program ရေးကြမယ်ပေါ့။ကျောင်းမှာ သင်သလောက်က SDK လေးနဲ့တင် Run တဲ့အထိပဲလေ။ Notepad လေးဖွင့်၊ Java Code တွေရိုက်၊ သိမ်း၊ ပြီးရင် cmd ကနေ သွား Run။ ဒီထိပဲ။အခု GUI ကျတော့ Notepad မှာ ထိုင်ပြီး Code နေလို့ မရတော့ဘူးလေ။ ရအောင်လုပ်လည်း လချီကြာမှာပဲ။

ကဲ အဲဒီတော့ Java ကို GUI ရေးလို့ရတဲ့ Program တွေ ရှာရတော့တာပေါ့။ တွေ့တယ်။ NetBeans တဲ့။ JBuilder တဲ့။ နောက်လည်း ကျန်သေးတယ်။ ဒါပေမဲ့ ဒီနှစ်မျိုးက လူသုံးများတယ်တဲ့။အဲ နှစ်ခုကြီးများတောင်။ ဘယ်ဟာက ပိုကောင်းသလဲပေါ့။ Master တန်းက သူငယ်ချင်းတွေက Master မပါတဲ့ အနော့်ဆီ အပူလာကပ်ပြီး မေးပါတယ်။ အဟမ်း.. အနော်လည်း နည်းနည်းပါးပါးစမ်းပြီး NetBeans ကိုသာ သုံးလို့ ပြောလိုက်ပါတယ်။ ဘာကြောင့်လဲဆိုတော့ NetBeans က Free ရတာပါ။ JBuilder က ၀ယ်သုံးရတာပါ။

JBuilder ဟာ NetBeans ထက် အများကြီး သာပေမယ့် ၀ယ်သုံးရတာဆိုတော့ အဆင်မပြေတော့ပါဘူး။ဒီနိုင်ငံမှာပဲနေမယ်။ ဒီမှာပဲ ရေးစားမယ်ဆိုရင်တော့ JBuilder ပဲကိုင်ပေါ့။ အဲ အပြင်ထွက်မယ်ဆိုရင်တော့ ဟိုမှာတွေက Copyright ရှိတယ်လေ။ ကိုယ် အလုပ်လုပ်မယ့် ကုမ္ပဏီက JBuilder ကို ၀ယ်သုံးသလား၊ မသုံးလားဆိုတာ ကိုယ်သိနိုင်တဲ့ ကိစ္စမှမဟုတ်ပဲ။ ဒါပေမဲ့ သူတို့လည်း Free ရတဲ့ NetBeans ကိုပဲ သုံးဖို့များပါတယ်လို့ ထင်ထားတာ။ ဟိုတစ်နေ့က စလုံးက သူငယ်ချင်းနှစ်ယောက်ကိုမေးကြည့်တော့ ဟုတ်တယ် NetBeans ပဲ သုံးကြတာတဲ့။ တစ်ယောက်ကတော့ ပြောပါတယ်။ မင်းဘာသာမင်း ဘယ် IDE ပဲ သုံးသုံး ကိစ္စမရှိဘူးတဲ့။ အဓိကက ပေးတဲ့အလုပ် ပြီးဖို့ပဲတဲ့။ ကျွန်တော်ဆိုရင်တော့ ရတဲ့လခလေးနဲ့ JBuider ကြီး ၀ယ်ပြီး လာအပ်တဲ့အလုပ်ကိုတော့ ရေးမပေးနိုင်ပေါင်။ Free ရတဲ့ဟာနဲ့ပဲ ရေးမှာပေါ့။